ADI IGLESIAS arrasa en Dubái, SUBCAMPIOA MUNDIAL!!

Aínda estamos que non o cremos!! Impresionantes os resultados da nosa Adi Iglesias Forneiro no CAMPIONATO DO MUNDO PARALÍMPICO que se está a desenvolver en Dubái desde o 7 de novembro ata este venres día 15, do que forma parte coa Selección Española nunha semana máis que intensa de emocións, boísimas sensacións e espectaculares logros.

Nesta competición a nivel mundial, a nosa velocista tomaba parte nas probas de 100 metros lisos, 200 m.l. e o relevo universal de 4x100m, deixándonos a todas e a todos atónitos ante cada novo récord que conseguía superar. Nas roldas semifinais dos 100 m.l. clasificábase por tempos co seu rexistro de 12.16, que ademais constitúa a segunda mellor marca da proba, pero sería ao día seguinte cando se proclamaba SUBCAMPIOA MUNDIAL, reducindo o seu tempo a 11.99 segundos que supoñían unha mellor marca persoal e a merecida medalla de prata.

A emoción non quedaría aí, pois na proba dos 200 m.l. lograba emocionarnos a todos/as con cada rolda, superándose a si mesma e establecendo un novo récord galego absoluto e SUB23 ata en tres ocasións, o que supón ser a galega máis rápida nesta modalidade ata o momento. O luns estreábase nas roldas eliminatorias co primeiro posto e un rexistro de 24.58, co que superaba a súa anterior MMP de 24.73 acadada esta tempada no Campionato de Galicia ao Aire Libre e establecía un novo récord galego absoluto. Ao día seguinte, repetiría o primeiro posto nas semifinais cunha nova MMP de 24.45, pulverizando o seu propio récord anterior e, xa pola tarde, recibía a segunda medalla de prata tras declararse novamente SUBCAMPIOA MUNDIAL, logo de rexistrar 24.31 na rolda final, triplicar a súa mellor marca persoal e establecer o récord autonómico definitivo da proba.

Por se fose pouco, hoxe participaba nas semifinais do relevo universal 4x100m co equipo español e conseguían clasificarse cun rexistro de 49.45, con moitas posibilidades de optar a medalla na rolda final da proba, que se disputará ás 20:55 hora local (17:55 hora española).

Como vos quedades? Nós non temos máis palabras para esta crack, GRANDÍSIMA NORABOA, ADI!!