CAMPIONATO GALEGO CAMPO A TRAVÉS – XOGADE (sábado 16 febreiro, Ourense)

Logo das fases previas, por fin chegou a gran data galega de cross para os/as atletas da nosa Escola de Atletismo e categoría SUB16 do club, co CAMPIONATO GALEGO DE CAMPO A TRAVÉS do vindeiro sábado 16 de febreiro, que será acollido no Complexo Deportivo de Monterrei, no Concello de Pereiro de Aguiar (Ourense).

Tras superar as fases preparatoria, clasificatoria e o Campionato Provincial que tivo lugar a principios do mes, finalmente o LUCUS CAIXA RURAL GALEGA contará con representación tamén neste último asalto, no que tanto os/as participantes individuais como os equipos teñen en xogo os títulos autonómicos desta modalidade deportiva. Na categoría SUB12, será o equipo das rapazas o que loite polos primeiros postos, tras dominar o Provincial no circuíto de Vilalba; mentres que na SUB14 serán Teo de Frutos e Estela Díaz, os individuais clasificados na carreira masculina e feminina da categoría. Rubén Darriba fará o seu nos case 5.000 metros da SUB16, acompañado polo equipo feminino, que repetirá a participación logo de proclamarse campión provincial.

Deixámosvos o circuíto e os horarios das carreiras segundo a categoría, que empezarán a partir das 11:30 horas coa SUB16 e rematarán sobre a hora de xantar, cos SUB12.

A saída será en autobús desde Lugo (ás 8:30 horas diante do Pavillón Casa do Deporte, na Avda. Infanta Elena), tomarán alí o xantar que proporciona a organización e voltarase ao remate da entrega de premios.

LEMBRADE OS SEGUINTES ASPECTOS IMPORTANTES DE CARA Á VIAXE E A COMPETICIÓN:

• Acudir, polo menos, 10 minutos antes da hora de saída do autobús, co documento persoal de identidade. PRÉGASE PUNTUALIDADE.
• En caso de non acudir por causa imprevista, avisar canto antes a calquera dos/as monitores/as responsables, así como se algún neno ou nena non viaxase no autobús en algún dos traxectos.
• Traer imperdibles para colocar o dorsal asignado, ademais de zapatillas de cravos (se tedes) e roupa de cambio (segundo a meteoroloxía).
• Vestir a equipación de competir do Club ou, no seu defecto, a roupa de adestramento obrigatoria da Escola (camiseta e sudadera).
• Disfrutar moito da xornada, competir e divertirse en familia.

A DAR O MELLOR DE VÓS!!